سور الإحترام
إيلا راب سور الإحترام
و علات العين عل الحاجب
يكثر النڭير ؤ لخصام
و يروج القول الخايب
يطيح الميزان ف لكلام
يهيج الحرف الغاضب
الخاوة يڭطعو السلام
تشعل الفتنة ف النسايب
المستور تفضحو لفام
يتعراو شلا مصايب
اللسان يتبورد بلا لجام
الشتايم ف الشفايف تتجاذب
العشرة تصيبها لسقام
و الولف من الحال ناذب
العديان يزرعو ألغام
لابسين كيد الثعالب
ف الخبث يستاهلو وسام
يعجبهم العش الرايب
الحال من الحالة يضام
الخاطر جروحو تتساكب
الڭانة تحجبها لندام
و الضمير معلول يعاتب
عبدالجليل خالدي
تعليقات
إرسال تعليق