هشام اوحنان
القصيدة الحاصلة على الرتبة الثالثة في صنف الزجل
(( زريبة الكلام))
الحال طايح
جايب سهم مسموم
وشاعل نار الصهدة
والدمع سايح
ع الخد شوم
جايب من حروفو رعدة
الواد مالح
ماه مطلي حموم
وجروفو دات جبح الشهدة
يا الزمان الجايح
لحتيني ف واد مانعرف نعوم
مانعرف الشوك مالوردة
همي على صدري لايح
نخسة و شلا هموم
لايح من صباط الحروف فردة
نوحي عرى ع الفضايح
وعرى ع المكتوم
خلا من دمعي دمعة وحدة
يا حرفي الملاوح
بين ورقة وقلم معصوم
شحال قدك تنهد من نهدة
شحال قدك تسامح
المغلوب فينا مصدوم
مايعرف لطعام بنة
مايعرف اليوم مالبارح
السر فينا مكلوم
طالب نص الحنة
طالب يمسح دمعي السارح
طالب منين يبدا
البوح معلوم
ما عرف يتمشى ولا يتمدى
الحال باكي والصبر دابح
جامع بين ساعة ويوم
جامع بين سيف ومقدة
شكون يهز راسو
يصفي السما م النجوم
يهز الكلام فكاسو
يروي الكلمة ب حر مقسوم
و يهز م الحلمة نعاسو
الحرف حلو ف تغماسو
وانا عبد مضلوم
خديت م المعنى ساسو
و معين الكلمة حرف محروم
وسقيت الكلام ف طاسو
الكلام فايح
شاد طريق مضيوم
طريقو جبدا
والهم سابح
ف جروف مابغات تكدا
مابغات تهدا
الحروف كتارت وشكون شافها
حرف مكافح
وحرف نابح
شكون يفك لغز الحلمة
يشعل فتيل الصبر
و يسد ظهر القبر
و يمد الصواب م الكلمة
الحروف كتارت وشكون عافها
حرف مالح
وحرف ملاوح
شكون يبدل النغمة
يزيد فيها شبر
يحطها ع الميزان ويعبر
ويجمع بين قصيدة وعرك كتافها
هشام اوحنان
تعليقات
إرسال تعليق