القصائد الحاصلة على المرتبة الثالية

                                 نجاة احسايني

25 نوصيك يا صاح ترطب اللسان

الشوفة فَ الناس خَلِّيها زينة

راه الكلام الزين مقامو شان

والعين لَمْبَسْمَة تْحَيَّدْ الَغْبينَة

خَلِّي القلب حمامة يدوي ب الامان

والخزرة الصافية ماتْجيب الَحْزينة

لا تكون منجل يحصد الجْنان

وَلَاغرابْ ديما تابْعاهْ قْرينة

راه الكلام كْثَر والغيوان

علی الحاقَد ومول الغيبة والنميمة

دير ليكْ عند الله وبين الناس مْكان

تعيش حياة هانْية مافيها رْوينة

راه العين هَلْكَتْ شحال من قومان

وْحتی واحد فينا ماخطاتو عوينة

الكلام لحلو شجرة عاليَة بَ غْصان

تجْني غَلَّتهاعلی الدْوامْ وْليكْ تهانينا

فَكَّرْ يا صاحْ ف هاذ الكلام والمْعان

ونَخْتَمْ كلامي بْ دعوةْ الله يهدينا

مليكة بوبراهيمي

10 
الدنيا فيها ناس ؤ ناس
ناس من اخيار الناس 
تغزل من عين الرحمة
محبة صافية صادقة
تبعث الفرحة
في قلوب الغير
تشجع و تواسي 
ؤناس يا لطيف منهم
تغزل بخيوط دفلة حنطل
نابعة من صميم قلب كحل
حقد ؤ حسد ؤ غل
يسد الروح..... 
ناس ياكلو ف لحم الغير
الله عليك يا إنسان 
الحقد والحسد 
عمى عينيك
تطلع لغيرك
ما تفرق بين محبة و لا كره
علاش و انت عارف 
الدنيا ما دايما لحد
ازرع الخير و المحبة 
وانس الحقد والحسد 
اعرف اليوم ها انت هنا
ؤ غذا يعلم الله تذكر بالخير
عش في سلام
وخليك بعيد على 
كل ما يتعلق بالغير