القصائد الحاصلة على المرتبة الرابعة

علي السعيدي

23 من شَرّك يا هاذ نفوس
عسل لوقات سايح
ؤ أنت هازة شوكتك
ؤ بلا سْباب حاقدة
جاك لعوين راغب 
ؤ أنت لَّعْيوب واجدة
ف ركنة شَّر داگة وتاد
ؤ عين لغذر مفاگدة
تطل من شرجم لْباس
على ناس مْجاحدة
غمزتها عين لخواض
ؤ نيابها ف لعباد شادة
بالهم تخيط لمحاين
ؤ تفصّل وْقات ناكدة
من ورا الشمس تطلع 
ك الحية مطوية راگدة
ف خَز لِيام تشقا ؤ تعوم
عل السُّو ؤ الضر معاندة
غدا تجف عين الحاسد
ؤ نارها ف جُّوف باردة
دٌّق الرحمة ف باب لعمر
تلگا ناس لوفا لله ساجدة
ؤ عيون النقايم ؤ الشر
تعيش المحاين شاردة

امال بهية

30 جا ايْهَنّي ويْباركْ
حامَل مشْموم الوردْ
صابَغْ الضّحكة
ناقَشْ الكذْبة
يْمَصّْ ف الحامضْ
خَذْلاتو كلمة مبروك
ف حَلْقو عَلقَتْ
أعْزَفْ الحِقْدْ
يدّو رَجْفَت
عْيونو رقْصَتْ
طَلّْعَتْ ب قامْتي ونَزّْلتْ
عامَلْ فَرحانْ يْصَفَّقْو ماكِيفوحَدّْ
قَلبو معْصور ينزَفْ بالسَّم
ناري بْغى يوقفْ
كَلمة (يَخّْ) على طَرفْ لسانو زَغَّردَتْ
عيون الحاقَدْ ياناس يَنْبوع احْسَدْ
مايَروي المحبَّة بالصّدق
ف عزّْ الفَرحة يَتْمنّى يْعزّيك
وفْ عزّْ المحنة يهْرَبْ ويضحك
وعيون الصافية بالحب تبرق 
يَنْبوعها شلال إخلاص يْرَقْرق